Ֆուտբոլի Չեմպիոնների լիգայի 1/8 եզրափակիչի առաջին խաղում մրցաշարի գործող գավաթակիր Մյունխենի «Բավարիան» հյուրընկալվելիս 4:1 հաշվով վստահ հաղթանակ տարավ իտալական «Լացիոյին»
Հռոմում տեղի ունեցած հանդիպման հաշիվը 9-րդ րոպեին բացեց «Բավարիայի» լեհ հարձակվող Ռոբերտ Լևանդովսկին, որն օգտվեց «Լացիոյի» արգենտինացի պաշտպան Մատեո Մուսակիոյի կոպիտ սխալից: 32-ամյա Լևանդովսկին 72-րդ գրոլը խփեց Չեմպիոնների լիգայում և, շրջանցելով Մադրիդի «Ռեալի» լեգենդար հարձակվող Ռաուլ Գոնսալեսին, մրցաշարի պատմության լավագույն ռմբարկուների ցուցակում բարձրացավ երրորդ տեղ: Նրանից շատ գոլ խփել են միայն 36-ամյա պորտուգալացի Կրիշտիանու Ռոնալդուն (134 գոլ) և 33-ամյա արգենտինացի Լիոնել Մեսին (118 գոլ):
Առաջին խաղակեսում անգլիացի կիսապաշտպան Ջամալ Մուսիալան և գերմանացի վինգեր Լերոյ Սանեն մեծացրին գերմանական ակումբի առավելությունը, և թիմերն ընդմիջման գնացին 0:3 հաշվի պայմաններում: 17-ամյա Մուսիալան դարձավ «Բավարիայի» կազմում Չեմպիոնների լիգայում գոլ խփած ամենաերիտասարդ ֆուտբոլիստը:
Երկրորդ խաղակեսի սկզբնամասում թիմերը խփեցին մեկական գոլ: 46-րդ րոպեին ինքնագոլի հեղինակ դարձավ «Լացիոյի» իտալացի պաշտպան Ֆրանչեսկո Աչերբին, իսկ 3 րոպե անց դաշտի տերերի արգենտինացի կիսապաշտպան Խոակին Կորեան կրճատեց հաշիվը՝ 1:4: Հանդիպման մնացած ժամանակահատվածում դարպասի գրավումներ չարձանագրվեցին:
Օրվա մյուս խաղում Իսպանիայի առաջնության առաջատար Մադրիդի «Աթլետիկոն» ընդունեց Լոնդոնի «Չելսիին» և պարտվեց նվազագույն հաշվով: Անգլիական ակումբի հաղթական գոլը 68-րդ րոպեին շրջադարձ հրավածով խփեց ֆրանսիացի հարձակվող Օլիվյե Ժիրուն: Հանդիպումն անցկացվեց չեզոք դաշտում՝ Ռումինիայի մայրաքաղաք Բուխարեստի Ազգային ստադիոնում:
Այս զույգերի պատասխան հանդիպումները տեղի կունենան մարտի 17-ին:
Չեմպիոնների լիգա, 1/8 եզրափակիչ, առաջին հանդիպումներ
«Լացիո» (Իտալիա) — «Բավարիա» (Գերմանիա)՝ 1:4 (տեսանյութ)
Խոակին Կորեա, 49 – Ռոբերտ Լևանդովսկի, 9, Ջամալ Մուսիալա, 24, Լերոյ Սանե, 42, Ֆրանչեսկո Աչերբի, 46 (ինքնագոլ)
«Աթլետիկո» (Իսպանիա) — «Չելսի» (Անգլիա)՝ 0:1 (տեսանյութ)
Օլիվյե Ժիրու, 68
Հետևեք NEWS.am SPORT-ին Facebook-ում և Twitter-ում
Discussion about this post