Գերմանիայում ավելի քան 300 գարեջրի գործարան բաց նամակ է ուղղել կառավարությանը ֆինանսական օգնության խնդրանքով: Ձեռնարկությունները պատմել են, որ իրենք ստիպված են մի քանի միլիոն եվրոյի «գարեջրի հսկայական պաշարներ» ոչնչացնել, քանի որ վաճառել այն չի հաջողվել, իսկ պիտանելիության ժամկետը լրացել է, գրում է Forbes-ը:
Գերմանիայում գարեջրի պահանջարկն ընկել է կարանտինի պատճառով. երկրում երկրորդ լոքդաունը շարունակվում է նոյեմբերից: Հանրապետությունում բարերը, պանդոկները, հյուրանոցներն ու ռեստորանները փակ են: Գարեջրագործները ստիպված էին վերացնել այն ապրանքները, որոնցից մեծածախ գործընկերները հրաժարվել էին: Բացի այդ, անհասանելի է դարձել նաեւ վաճառքի երկրորդ ալիքը` փառատոններն ու այլ միջոցառումները: Չվաճառված ապրանքը փչանում է, իսկ պահեստները լեփ-լեցուն են:
Կառավարությունն աջակցության ծրագրերի շրջանակներում գումար էր հատկացնում պանդոկներին եւ բարերին, սակայն գարեջրի գործարանները գումար ստացողների ցուցակում չհայտնվեցին: Այդ պատճառով շուրջ 1500 գարեջուր արտադրող, հիմնականում` միջին եւ ընտանեկան բիզնեսները, առանց օգնության մնացին եւ կարող են փակվել, նշվում է նամակում: Գործարաններն ընդգծել են, որ շշալցված գարեջրի վաճառքը «անգամ մոտ» չի կարող փոխհատուցել բաց թողնված եկամուտը զվարճանքի եւ հանգստի ոլորտում:
Նամակը ստորագրել է գարեջրի գործարանների երկու խոշոր ասոցիացիա` DBB-ն եւ VPBD-ն: Ստորագրածների թվում է նաեւ Carlsberg Deutschland-ը` դանիական Carlsberg-ի գերմանական դուստր ձեռնարկությունը:
2020 թվականին Երկրորդ համաշխարհային պատերազմից ի վեր առաջին անգամ չեղյալ հայտարարվեց գերմանական գարեջրի ամենահայտնի փառատոնը` Օքթոբերֆեստը: Դրա սկիզբը ախատեսված էր սեպտեմբերի 19-ին, իսկ չեղարկել այն որոշվել էր դեռ ապրիլին:
Discussion about this post